काठमाडौँ । राजधानी काठमाडौँमा भएको आगलागीमा परेर एक जना युवकको मृत्यु भएको छ । टोखा नगरपालिका १० बानियाँटार हाईटस्थित ३५ वर्षीय खेम नारायण चालिसेको घरमा भाडामा बस्ने दोलखा कालिञ्चोक गाउँपालिका २ घर भएका २१ वर्षीय किरण बुढाथोकीको आगलागीमा जलेर मृत्यु भएको हो ।

किरणको कोठामा गएराति आगलागी हुँदा जलेर गम्भीर घाइते भएका थिए । उनको त्रिवि शिक्षण अस्पताल महाराजगन्जमा उपचारको क्रममा मृत्यु भएको प्रहरीको भनाई छ । आगलागीबाट करिब १५ लाख रुपैयाँ बराबरको धनमा क्षति भएको छ । आगलागी नियन्त्रणमा लिनुका साथै यस सम्बन्धमा प्रहरीले आवश्यक अनुसन्धान गरिरहेको छ ।

यता झापाको बिर्तामोड नगरपालिका ५ बसपार्क मोडस्थित चारआलीबाट बिर्तामोडतर्फ जाँदै गरेको १ च ३५५३ नम्बरको मारूती भ्यानमा आइतबार राति अचानक आगलागी हुँदा इन्जिनको भाग जलेर क्षति भएको छ । त्यस्तै रौतहटको ईशानाथ नगरपालिका ४ महुलिया टोल बस्ने धीरेन्द्र पटेल लगायत ३ जनाको घरमा आइतबार राति आगलागी हुँदा तीनै जनाको गरी करिब ६ लाख रुपैयाँ बराबरको धनमाल जलेर नष्ट भएको छ ।