काठमाडौं । सुदूरपश्चिम प्रदेशका मुख्यमन्त्री कमलबहादुर शाहले विश्वासको मत लिँदैछन्।

आज बिहीबार तीन बजे बस्ने प्रदेश सभा बैठकमा उनले विश्वासको मत लिने कार्यसूची रहेको प्रदेश सभा सचिवालयका सचिव देवबहादुर बोगटीले जानकारी दिएका छन् ।

नयाँ गठबन्धन सहितको सरकार बनेपछि सुदूरपश्चिममा पनि त्यसको असर परेको छ।

सुदूरपश्चिम सरकारबाट नेकपा (माओवादी केन्द्र) र नेकपा (एकीकृत समाजवादी) ले समर्थन फिर्ता लिएपछि मुुख्यमन्त्री शाह अल्पमतमा परेका हुन्।

समर्थन फिर्ता लिएको एक महिनाभित्र मुख्यमन्त्रीले विश्वासको मत लिनुपर्ने संवैधानिक प्रावधान छ।

नेपाली कांग्रेसका १८, नागरिक उन्मुक्ति पार्टी (नाउपा) का सात, राप्रपाका एक र एक स्वतन्त्र दलको समर्थन जुटाएर विश्वासको मत पाउने दाउमा मुख्यमन्त्री रहेका छन्। तर,सुदूरपश्चिम प्रदेश सरकारकै विषयलाई लिएर पार्टीमा हाल उत्पन्न भएको विवादका कारण नागरिक उन्मुक्ति पार्टीले मत दिने नदिने कुरामा पनि विभाजित हुने देखिएको छ।

मुख्यमन्त्री शाहलाई विश्वासको मत दिने/नदिने विषयमा पार्टीभित्रैबाट बुधवार दुईवटा ह्विप जारी भएका छन्। ७ जना प्रदेश सभा सदस्य रहेका आफ्ना सांसदहरूलाई मुुख्यमन्त्रीलाई मतदान नगर्न नाउपाकी अध्यक्ष रञ्जिता श्रेष्ठले नै ह्विप जारी गरेकी छन्। उनले लिखित रुपमै मुख्यमन्त्री शाहलाइ विश्वासको मत नदिन निर्देशन दिएकी हुन्। यस्तै पार्टी प्रमुख सचेतक खुशीराम डगौरा थारूको पनि ह्विप जारी भएको छ। उनले मुख्यमन्त्रीलाई विश्वासको मत दिन ह्विप जारी गरेका हुन्।

उनले मुख्यमन्त्रीलाई विश्वासको मत दिन नाउपका सबै प्रदेश सभा सदस्यलाई निर्देशन दिएका छन्। हाल नाउपाका ५ जना सांसद शाह नेतृत्वको सरकारमा नै सामेल छन्।

एक सांसद रहेको राष्ट्रिय प्रजातन्त्र पार्टीले भने विश्वासको मत दिने संकेत गरेको छ।

मुख्यमन्त्री शाहलाई नाउपाका सातै जना, स्वतन्त्र सांसद तारा जोशी र राप्रपाले समर्थन गर्दामात्रै विश्वासको मत पुग्नेछ।