बिरगंजमा राष्ट्रिय दलित पत्रकार संघ पर्साको कार्यालय उद्वघाटन  कार्यक्रम सम्पन्न भएको छ ।
राष्ट्रिय दलित पत्रकार संघ पर्सा जिल्ला शाखा कार्यालयको बुधवार एक कार्यक्रमका बिच उद्घघाटन भएको थियो ।बिरगंज महानगरपालिका वडा न. ८ ब्यारेकको पुर्व पानीट्याङ्की स्थित कार्यालयको प्रदेश नम्बर २ का प्रदेश सभा सदस्य एवम् संसदीय दलका प्रमुख सचेतक सुन्दर विश्वकर्माले उद्घघाटन गर्नु भएको थियो ।

संघका जिल्ला अध्यक्ष श्याम पासवानको अध्यक्षतामा भएको कार्यालय उद्घघाटन समारोहलाई सम्बोधन गर्दै प्रदेश सभा सदस्य विश्वकर्माले जाततन्त्र राजतन्त्र भन्दा पनि खतरा रहेको बताए । राजतन्त्र अन्त्य भएपनि समाजबाट जातीय व्यवस्था व्यावहारिक रुपमा निर्मुल हुन नसक्दा दलित समुदाय उपेक्षामा पर्दै आएको विश्वकर्माको भनाई छ । विगतमा अपमानपूर्वक हुने विभेदको स्वरुप परिवर्तन भएर सम्मानपूर्वक विभेदको रुप लिएको प्रदेश सभा सदस्य विश्वकर्माले बताए ।

जिल्ला प्रशासन कार्यालय पर्साका सहायक प्रमुख जिल्ला अधिकारी भिमकान्त पौडेलले प्रशासनतर्फ पनि दलितको सहभागीता बढाउनका लागि सरकारले दलित आरक्षणको व्यवस्था गरेको बताए । समयको विकास क्रमसँगै मानिसको मानसिकता पनि विकास हुने क्रममा रहेको हुँदा विस्तारै जातिय व्यवस्था व्यवहारिक रुपमा पनि अन्त्य हुने पौडेलको विश्वास छ ।

त्यसैगरी बिरगंज उद्योग वाणिज्य संघका अध्यक्ष डा.सुबोध कुमार गुप्ताले जातिय विभेदको विरुद्धमा जनतालाई जागरुप बनाउनुपर्नेमा जोड दिएका छन् । दलित पत्रकार संघसँग सहकार्य गरेर जातीय व्यवस्थाको विषयमा बहस गर्न अन्तरक्रिया कार्यक्रमको आयोजना गर्न संघलाई सुझाव दिँदै संघका हरेक गतिविधिमा सहयोग गर्ने पनि डा. गुप्ताले प्रतिबद्धता जनाएका छन् ।
समाजको तिथो यथार्थको विरुद्धमा दलितका आवाजलाई दलित पत्रकारले नै उठान गर्नुपर्नेमा गुप्ताको जोड थियो ।

नेकपा एकीकृत समाजवादी पार्टी पर्साका अध्यक्ष बालगोपाल थापाले मानसिकतामा परिवर्तन नआएसम्म जातीय विभेदजस्ता विकृतीको अन्त्य नहुने बताए ।

यस्तै पहुँचमा पुगेका दलितहरु नै शासक बन्दा पनि दलित समुदायको उत्थान हुन नसकेको नेकपा माओवादी केन्द्र बिरगंज महानगर कमिटीका अध्यक्ष रहबर अन्सारीको धारणा छ । निर्वाचित जनप्रतिनीधि, राजनीतिक दलका प्रतिनीधि एवम् बाहिर समानताका कुरा गर्नेहरुले नै छुवाछुत र जातीय विभेदलाई अंगीकार गर्दा परिवर्तन हुन नसकेको भन्दै अन्सारीले चिन्ता व्यक्त गरे ।

जनता समाजवादी पार्टी (जसपा) पर्साका सचिव तबरेज अहमदले देशमा अँझै पनि जातीय विभेदको विषयमा बहस हुनु दुखद विषय भएको बताए । समानता र समावेशिताको विषयमा जसपाले विगतदेखि नै आवाज उठाउँदै र दलितलाई पनि अवसर प्रदान गर्दै आएको अहमदको दावी छ ।

नेपाल पत्रकार महासंघका केन्द्रिय सदस्य केसी लामिछानेले परिवर्तनको सुरुवात आफैबाट गर्नुपर्ने बताए । अरुका आवाज उठाउने पत्रकारहरु आफै कुन अवस्थाबाट गुज्रिरहेका छन् भन्ने सोच्नुपर्ने विषय भएको बताउँदै लामिछानेले आफूलाई ठूलो मिडिया हाउस भन्नेहरुले पनि न्युनतम पारिश्रमिक समेत लागु नगरेको बताए ।

सो कार्यक्रममा जिल्ला प्रहरी कार्यालय पर्साका प्रमुख प्रहरी उपरीक्षक रमेशकुमार बस्नेत, सशस्त्र प्रहरी नायब उपरीक्षक सन्तोष कुमार बस्नेत, नेपाल पत्रकार महासंघ प्रदेश नम्बर २ का महासचिव श्याम बन्जरा, राष्ट्रिय दलित आयोगका पूर्व सदस्य गया हजरा पासवान, जिल्ला ट्राफिक प्रहरी कार्यालय पर्साका प्रमुख प्रहरी निरीक्षक सुमन कार्की, माओवादी केन्द्र प्रदेश नम्बर २ का सदस्य रामबाबु बैठा, नेकपा एकीकृत समाजवादी पार्टी बिरगंज महानगर अध्यक्ष मनोज चौधरी, राष्ट्रिय दलित पत्रकार संघ प्रदेश २ की कोषाध्यक्ष सावित्री शर्मा , व्यवस्थित बिरगंज अभियानका संयोजक दिलिप राज कार्की , सामुदायिक आखा अस्पतालका डा. महेश सिंह धामि , सर्वराष्ट्रिय दैनिकका प्रकाशक सम्पादक महेशचन्द गौतम , नेपाल पत्रकार महासघ प्रदेश न.२ का पुर्व सदस्य जगत राई , दलित पत्रकार संघ पर्साका पदाधिकारीहरु लगायतको उपस्थिती रहेको थियो ।

संघका सल्लाहकार बृजलाल पासवानले स्वागत मन्तव्य व्यक्त र कार्यक्रमको सहजीकरण संघका सचिव सूर्यनारायण वि.क.ले गरेका थिए ।