सिन्धुपाल्चोक–२ मा प्रतिनिधिसभा निर्वाचन हुन अब एक साता पनि बाँकी छैन । चुनाव नजिकिँदै जाँदा यहाँको राजनीतिक माहोल दिनप्रतिदिन रोचक र प्रतिस्पर्धात्मक बन्दै गएको छ । विशेषगरी राष्ट्रिय प्रजातन्त्र पार्टी ९राप्रपा० का युवा नेता इन्जिनियर गोपिकृष्ण चौलागाईंको सक्रिय घरदैलो अभियानले निर्वाचन क्षेत्रलाई नयाँ ऊर्जा दिएको छ । गाउँ–गाउँ, टोल–टोलमा पुगेर प्रत्यक्ष भेटघाट गरिरहेका चौलागाईंप्रति युवापुस्तादेखि अग्रज मतदातासम्म सकारात्मक प्रतिक्रिया देखिन थालेको स्थानीय राजनीतिक विश्लेषकहरूको ठहर छ ।

घरदैलो अभियानका क्रममा चौलागाईंले सडक, शिक्षा, स्वास्थ्य, रोजगारी र सुशासनलाई मुख्य प्राथमिकतामा राख्दै स्पष्ट दृष्टिकोण सार्वजनिक गरिरहेका छन् । मतदातासँग सीधा संवाद गर्दै उनले “विकासको निरन्तरता मात्र होइन, परिणाममुखी कार्यान्वयन” आवश्यक रहेको बताइरहेका छन् । लामो समयदेखि उही अनुहार दोहोरिँदै आए पनि अपेक्षित परिवर्तन नभएको गुनासो व्यक्त गर्ने मतदाताहरू यसपटक नयाँ र युवा नेतृत्व खोजिरहेको देखिन्छ । यही मनोभावलाई सम्बोधन गर्दै चौलागाईंले आफूलाई जिम्मेवार, प्राविधिक ज्ञानयुक्त र योजनाबद्ध विकास गर्न सक्ने उम्मेदवारका रूपमा प्रस्तुत गरेका छन् । यस क्षेत्रमा पटक–पटक विजयी भएका दल र नेताहरूले धेरै आश्वासन दिए पनि अपेक्षित उपलब्धि हासिल नभएको चर्चा मतदातामाझ व्यापक छ । यस्तो अवस्थामा राप्रपाले अघि सारेको घोषणापत्र र एजेन्डा “मुलुक सुहाउँदो” र व्यावहारिक भएको भन्दै समर्थकहरूले दाबी गरिरहेका छन् । सुशासन, पारदर्शिता, सांस्कृतिक पहिचानको संरक्षण र आर्थिक आत्मनिर्भरतालाई जोड दिएको एजेन्डाले विशेषगरी युवापुस्तामा आकर्षण बढाएको देखिन्छ । राजनीतिक विश्लेषकहरूका अनुसार, वैकल्पिक शक्तिको खोजीमा रहेका मतदाताका लागि राप्रपा यसपटक बलियो विकल्पका रूपमा उदाउँदै गएको छ ।

इन्जिनियरिङ पृष्ठभूमि भएका चौलागाईंले पूर्वाधार विकास, विपद् व्यवस्थापन र दीर्घकालीन योजना निर्माणमा आफ्नो अनुभव उपयोग गर्ने प्रतिबद्धता व्यक्त गरेका छन् । सिन्धुपाल्चोक भूकम्प र बाढीपहिरोबाट पटक–पटक प्रभावित जिल्ला भएकाले प्राविधिक दक्षता भएको नेतृत्व आवश्यक रहेको उनको तर्क छ । जोखिम न्यूनीकरण, सुरक्षित बस्ती विकास, दिगो सडक सञ्जाल र आधुनिक कृषि प्रवर्द्धनलाई प्राथमिकतामा राख्ने उनले स्पष्ट पारेका छन् । यही सन्देशसहित अघि बढिरहेको उनको घरदैलो अभियानले चुनावी वातावरणलाई थप तातेको बनाएको छ ।

यस्तै, पछिल्लो समय देशव्यापी रूपमा उठिरहेको ‘जेन–जी आन्दोलन’का मुद्दा—सुशासन, रोजगारीको सुनिश्चितता, पारदर्शी राजनीति, डिजिटल रूपान्तरण र अवसरमा समान पहुँच—लाई आत्मसात गर्दै अघि बढ्ने प्रतिबद्धता पनि चौलागाईंले व्यक्त गरेका छन् । युवाहरूको आवाजलाई नीतिगत तहसम्म पुर्‍याउने, नीति निर्माणमा प्रविधिमैत्री र उत्तरदायी प्रणाली विकास गर्ने तथा भ्रष्टाचारविरुद्ध शून्य सहनशीलताको नीति अवलम्बन गर्ने उनको घोषणा छ ।
अन्तिम फैसला त मतपेटिकाबाटै आउने हो । तर वर्तमान अवस्थाले के संकेत गर्छ भने, सिन्धुपाल्चोक–२ मा यसपटकको प्रतिस्पर्धा अत्यन्त कडा र रोचक हुने निश्चितजस्तै देखिएको छ । युवा नेतृत्वको खोजी, विकासप्रतिको स्पष्ट दृष्टिकोण, जेन–जी पुस्ताका मागप्रति संवेदनशील प्रतिबद्धता र पुराना वाचाबाट निराश बनेका मतदाताको मनोभावले इन्जिनियर गोपिकृष्ण चौलागाईंप्रति भरोसा बढ्दै गएको छ । यही कारण, सिन्धुपाल्चोक–२ को निर्वाचन यसपटक ऐतिहासिक मोडतर्फ उन्मुख भएको राजनीतिक वृत्तमा चर्चा चलिरहेको छ ।