काठमाडौं, फागुन १२ – फागुन ४ गतेदेखि ८ गतेसम्म दशरथ रंगशालामा सम्पन्न भएको चौथो माउन्ट एभरेष्ट अन्तर्राष्ट्रिय तेक्वान्दो च्याम्पियनसिप २०२६ मा बुढानिलकण्ठकी उदीयमान खेलाडी कृतिका कट्वाल ले स्वर्ण पदक जित्दै ऐतिहासिक सफलता हासिल गरेकी छन्।

२६ देशका खेलाडीहरूको सहभागिता रहेको उक्त प्रतिष्ठित प्रतियोगितामा कृतिकाले -४२ केजी तौल समूहमा उत्कृष्ट प्रदर्शन गर्दै फाइनलमा भारतकी प्रतिस्पर्धीलाई पराजित गरी स्वर्ण पदक जित्न सफल भएकी हुन्। प्रतिस्पर्धा अत्यन्तै रोमाञ्चक र प्रतिस्पर्धात्मक रहे पनि उनले आत्मविश्वास, संयमता र उत्कृष्ट प्राविधिक क्षमता प्रदर्शन गर्दै जित सुनिश्चित गरिन्।

यस जितसँगै कृतिका नेपाली तेक्वान्दो क्षेत्रमा थप चर्चित बन्दै गएकी छन्। उनले यसअघि सम्पन्न भएको 13th Korean Ambassador International Taekwondo Championship मा समेत स्वर्ण पदक जितेर आफ्नो निरन्तर उत्कृष्ट प्रदर्शनलाई प्रमाणित गरिसकेकी छन्।

बुढानिलकण्ठ नगरपालिका–१० निवासी कृतिका हाल Fairyland Taekwondo Dojang मा नियमित प्रशिक्षण लिइरहेकी छन्। सानै उमेरदेखि तेक्वान्दोमा समर्पित रहँदै आएकी उनले विभिन्न राष्ट्रिय तथा अन्तर्राष्ट्रिय प्रतियोगितामा उल्लेखनीय सफलता हासिल गरिसकेकी छन्।

उनको मेहनत, अनुशासन र निरन्तर अभ्यासकै कारण उनी आज बुढानिलकण्ठकै सफल तथा आशालाग्दी तेक्वान्दो खेलाडीका रूपमा स्थापित भएकी छन्। कृतिकाको यो उपलब्धि केवल स्थानीय स्तरमै सीमित नभई सिंगो राष्ट्रकै गर्वको विषय बनेको छ।

लगातारको स्वर्णिम यात्रासँगै कृतिका कट्वाल नेपाली तेक्वान्दोको उज्ज्वल भविष्यका रूपमा अघि बढिरहेकी छन्।