सिन्धुपाल्चोक–२ मा प्रतिनिधिसभा सदस्य निर्वाचनको चुनावी माहोल तीव्र रूपमा तातिँदै गएको छ। आगामी निर्वाचनलाई लक्षित गर्दै राष्ट्रिय प्रजातन्त्र पार्टी (राप्रपा) ले इन्जिनियर पृष्ठभूमिका युवा नेता गोपालकृष्ण चौलागाईं लाई उम्मेदवारका रूपमा अघि सारेसँगै निर्वाचन क्षेत्रको राजनीतिक समीकरण थप रोचक बन्दै गएको छ।
भौतिक पूर्वाधार विकास, समग्र समृद्धि र सुशासनलाई आफ्नो मुख्य एजेन्डा बनाएर चुनावी मैदानमा उत्रिएका चौलागाईं अहिले गाउँ–गाउँ, टोल–टोल पुग्दै जनतासँग प्रत्यक्ष संवादमा जुटिरहेका छन्। देश नै ‘जेन–जी’ पुस्ताको नेतृत्वतर्फ उन्मुख भइरहेको सन्दर्भमा, युवा पुस्तालाई अगाडि सार्ने राप्रपाको निर्णयलाई मतदाताले सकारात्मक रूपमा लिन थालेका छन्।
राजनीतिमा क्रमिक उकासो गरेका चौलागाईं
राष्ट्रिय प्रजातन्त्र पार्टीका केन्द्रीय सदस्य गोपालकृष्ण चौलागाईं राजनीतिमा आकस्मिक रूपमा होइन, चरणबद्ध रूपमा उक्लँदै आएका नेता हुन्। नगर सदस्य, जिल्ला सदस्य हुँदै बागमती प्रदेश सदस्यको जिम्मेवारी सम्हालिसकेका उनी हाल पार्टीको केन्द्रीय सदस्यका रूपमा सक्रिय छन्। संगठन निर्माण, नीति बहस र जनसम्पर्कमा अनुभव सँगालेका चौलागाईंलाई पार्टीभित्र भविष्यका नेतृत्वका रूपमा हेरिने गरिएको छ।
इन्जिनियरिङ र सञ्चार क्षेत्रमा दख्खल
इन्जिनियरिङ पृष्ठभूमिका चौलागाईंले करिब एक दशक सञ्चार क्षेत्रमा पनि काम गरेका छन्। विकास, प्रविधि र जनचासोका विषयलाई नजिकबाट बुझ्ने उनको अनुभवले उनलाई अन्य उम्मेदवारभन्दा फरक र व्यवहारिक बनाएको समर्थकहरूको बुझाइ छ। उनी नेपाल इन्जिनियर्स एसोसिएसनका उपमहासचिव पदका उम्मेदवारसमेत रहिसकेका छन्।
शैक्षिक रूपमा पनि अब्बल मानिने चौलागाईं सरकारी विद्यालयबाट अध्ययन गर्दै परीक्षालाई सधैं अवसरका रूपमा लिने विद्यार्थीका रूपमा परिचित छन्। अधिकांश परीक्षामा उत्कृष्ट नतिजा हासिल गरेका उनले उच्च शिक्षासमेत छात्रवृत्तिमा अध्ययन गरेका हुन्।
समाजसेवामा अग्रपंक्तिमा उभिने व्यक्तित्व
बाल्यकालदेखि नै सबैसँग घुलमिल हुने स्वभावका गोपालकृष्ण चौलागाईं आर्थिक रूपमा आत्मनिर्भर बनेपछि समाजसेवामा सक्रिय हुँदै आएका छन्। बाटोघाटो निर्माण, मन्दिर संरक्षण, सामाजिक कार्य, विपन्न परिवारलाई सहयोग, कसैको घरमा चुलोमा आगो नबलेको अवस्थामा सहयोग— यस्ता काममा उनी सधैं अगाडि देखिन्छन्।
शिक्षाबाट आर्जन गरेको सीप, मनमा समाजसेवाको भावना र मुटुमा गहिरो देशप्रेम बोकेर राजनीतिमा अघि बढेका चौलागाईंको राजनीतिक दर्शन उनको एक भनाइले स्पष्ट पार्छ—
“भ्रष्टाचार गरेर खानु भनेको आमाको रगत खानु सरह हो।”
यस भनाइले नै उनको नैतिक सोच, राजनीतिक प्रतिबद्धता र नेतृत्व शैली झल्काउँछ।
मुख्य प्रतिस्पर्धा काङ्ग्रेस, एमाले र नेकपासँग
सिन्धुपाल्चोक–२ मा यसपटकको निर्वाचनमा राप्रपाका उम्मेदवार चौलागाईंको मुख्य प्रतिस्पर्धा नेपाली काङ्ग्रेस, नेकपा एमाले र नेकपाका उम्मेदवारहरूसँग हुने देखिन्छ। यी दलहरू परम्परागत रूपमा बलियो संगठन र मत आधार भएका पार्टीका रूपमा चिनिन्छन्।
यता राष्ट्रिय स्वतन्त्र पार्टी (रास्वपा) लगायत अन्य दलका उम्मेदवारहरूले पनि चुनावी मैदानमा सक्रियता बढाउँदै गर्दा मत विभाजनको सम्भावना कायमै रहेको राजनीतिक विश्लेषकहरूको भनाइ छ। यसले निर्वाचन परिणामलाई थप अनिश्चित र रोचक बनाएको छ।
मतदाताको निर्णयले नयाँ संकेत दिने कि?
राप्रपाको चुनाव चिन्ह ‘हलो’ लिएर जनताको घरदैलोमा पुगेका गोपालकृष्ण चौलागाईं पुरानो राजनीतिक अभ्यासभन्दा फरक, विकास र सुशासन केन्द्रित नयाँ सोच बोकेर मत मागिरहेका छन्।
अब सिन्धुपाल्चोक–२ मा एउटा गम्भीर प्रश्न उभिएको छ—
के यसपटक मतदाताले परम्परागत दल र पुरानै अनुहार रोज्नेछन्, कि नयाँ सोच, युवा नेतृत्व र व्यवहारिक दृष्टिकोण भएका उम्मेदवारलाई अवसर दिनेछन्?